ҚУРТХОНА — тут ипак қурти боқиладиган бино ёки хона. Капитал, ярим капитал ва енгил типдаги Қуртхона ларга бўлинади. Капитал қ. ғиштдан, ойнали қилиб қурилиб, поли лой ва қум билан сувалади; иситиш қурилмалари ўрнатилади. Ярим капитал Қуртхона каркас типдаги уйлардан иборат, хом ғишт, пахса деворли бўлиб, кичик ва катта ёшдаги қуртлар боқилади. Енгил типдаги Қуртхона каркасли, қамиш, фанера, брезент, полиэтилен ва б. енгил материаллар билан ёпилади, катта ёшдаги қуртларга мўлжалланган бўлади.
Ҳар бир Қуртхонада 3, 5, 10, 15, 25 қути қурт боқилади. Қуртхона ер ости суви чуқур, катта йўлдан узоқ (шовқини кам), тут плантацияларига яқин ерга қурилади. Қуртхона кўп хонали бўлиб, кичик (1-, 2-, 3-) ва катта (4-, 5-) ёшдаги қуртлар боқиладиган, етилган пилла сараланадиган, барг тайёрланадиган бўлинмалар, барг вақтинча сақланадиган 1 — 1,5 м чуқурликда бетонланган ертўла типидаги хоналари ҳам бўлади. Қуртхоналар зарур анжомлар (сўкчаклар, вентиля-тор, печка ва б.) билан жиҳозланади. Қурт боқишдан олдин Қуртхона тозаланади, дезинфекцияланади, шамоллатилади. Айрим жойларда Қуртхона сифатида хўжаликларнинг жамоат бинолари (омбор, қуритиш хоналари ва б.), хонадонлардаги бўш хоналардан вақтинча фойдаланилади (қ. Ипак қурти боқиш).