САЛИЦИЛ КИСЛОТА, о оксибензой кислота,о карбоксифенол, С7Н6О3 — оддий ароматик оксикислота, рангеиз кристалл модда. Мол. м. 138,12. Суюкланиш т-раси 159°, қайнаш т-раси 211°, Сувда оз, органик эритувчиларда яхши эрийди. Табиатда гликозид сифатида кенг тарқалган. Салицил кислотани спиртлар (феноллар) б-н қиздириб, Салицил кислота эфирлари олинади. Анилин билан реакцияга киришганда салициланилид ҳосил бўлади. Салицил кислота саноатда фенолни карбоксиллаб синтез қилинади. Антисептик хоссага эга бўлганлиги учун тиббиётда ва озиқ-овқат, меваларни консервалашда кўплаб ишлатилади. Аналитик кимёда ҳам қўлланади. Салицил кислотанинг метил, изоамил, бензил, фенил каби эфирлари муҳим аҳамиятга эга.
Тиббиётда антисептик, оғриқни қолдирувчи восита сифатида, сепма (2 — 5%), суртма (1 — 10%), паста ва спиртдаги эритма (1 ва 2%) ҳолида ишлатилади. Салицил кислота ва сирка кислотанинг мураккаб эфири — аспирин.