СУБТРОПИК ҒЎЗАЛАР, ғўзанинг субтропик шакллари — ҳозир экилаётган Ғузанинг юксак даражада маданийлаштирилган эволюцион шакллари. Улар хўжалик аҳамиятига эга бўлган қарийб барча белги ва кўрсаткичлар бўйича узоқ танлаш ва жаҳон пахтачилигининг қимматли генофонди маҳсулидир. Субтропик ғўзалар узоқ яшамайдиган, симподиал ва кескин симподиал ярим ўтсимон бута. Тукланиш даражаси, барг пластинкасининг катталиги ва шакли, чигитларининг тукланиши, тупининг типи, бўгимлари оралиғининг узунлиги, симподиал шохларининг типи, кўсакларининг катталиги ва шакли, толасининг узунлиги, тола чиқиши ва б. сифатлари ўзгариб туради. Толаси оқ, оч сариқ, бақувват ва узун; ёввойи ҳолда ўсиш қобилиятини йўқотган. Субтропик ғўзалар турли касалликларга нисбатан экологик чидамлилиги, ҳосилдорлиги, кўсагининг йириклиги, толасининг технологик сифати яхшилиги туфайли дунёдаги ғўза экиладиган барча мамлакатларда кенг тарқалган. Ареалнинг турли қисмларида агроэкологик шароитларга кўра экологикгеографик шаклларнинг ўша жойлар шароитига мослашган гурухлари, мас, Мексика ғўзасинтг Шарқий Америка, Ўрта Осиё, Шим. Хитой, Жан. Африка, Болқон ва б. да ўсадиган алоҳида гурухлари шаклланган.
Абдумавлон Абдумаев.