СУВ ОСТИ ТЕЛЕВИДЕНИЕСИ — сув остидаги манзара ва объектларни кузатиш учун мўлжалланган телевидение. С. о. т. да сув ости телевизион курилмасидан фойдаланилади. Бу курилма сигналларни қабул қилувчи ва узатувчи трубкалар; объектив; сатр ёйиш блоки, кадр ёйиш блоки; кучайтиргичлар, ёруғлик манбалари ва б. қисмлардан иборат. Асосий аппарати — сув остидаги телевизион камера. С. о. т. дан чўккан кемаларни қидириш, кемалар, гидротехника иншоотларининг сувга ботиб турган қисмларини текшириш, ғаввосларнинг ишини кузатиш, денгиз ва океанларнинг ҳайвонот ва ўсимлик дунёсини ўрганиш, балиқ тўдаларини, нефть конларини қидириш, сув ости миналарини излаш, сув ости қуролларини синаш ва б. мақсадларда фойдаланилади. Сув ости телевидениеси тизимидан бир неча юз метр чукурликда исталганча вақт давомида фойдаланиш мумкин.