ШОДМОНОВ Сулаймон Нуриллаевич (1938.15.9, Бухоро) — дирижёр, Ўзбекистон халқ артисти (2000). Тошкент консерваториясини хор дирижёрлиги (1960) ҳамда операсимфоник дирижёрлиги (1975) ихтисосликлари бўйича тугатган. Навоий театрида хормейстер (1960—66), бош хормейстер (1966-80), Ленинград опера ва балет театрида дирижёр-стажер (1980—82), Тошкент оперетта театрида дирижёр (1982—91), Навоий театрида бош хормейстер ва дирижёр (1991 й. дан). Мусиқали театр саҳнасида бир неча оперетта («Баядера», И. Кальман; «Гусар уйланиши», Г. Гладков ва бошқалар), ўзбек («Буюк Темур», А. Икромов; «АлФарғоний», М. Бафоев; «Сўғд элининг қоплони», Ик. Акбаров) ҳамда Европа мумтоз («Лючия ди Ламмермур», «Тунги қўнғироқча», Г. Доницетти; Ўзбекистонда илк марта) операларини дирижёр сифатида саҳналаштирган.