УБАЙДУЛЛАЕВ Абдулла Муҳаррамович

УБАЙДУЛЛАЕВ Абдулла Муҳаррамович (1934.20.3, Тошкент) — пульмонолог олим. Ўзбекистон ФА акад. (2000), Ўзбекистонда хизмат кўрсатган тиббиёт ходими (1998), тиббиёт фанлари д-ри (1974), проф. (1979). ТошТИни тугатгач (1958), Тошкент врачлар малакасини ошириш ин-тида клиник ординатор (1958 — 60), аспирант (1961 — 64), ассистент (1964—65), доцент (196670), терапия фти декани (1974 — 86), пульмонология ва клиник аллергология кафедраси мудири (1978 й. дан), 1986 й. дан Фтизиатрия ва пульмонология и. т. институти директори. Ўзбекистонда пульмонологлар мактаби асосчиси.

Илмий фаолияти Ўзбекистонда нафас аъзолари касалликларининг эпидемиологияси, бронхиал астма ва ўпка сурункали обструктив касалликларининг генетик омилларини ўрганиш, сил касаллигини эрта аниқлаш, ёндош касалликлар билан кечувчи силнинг патогенези, силга қарши доридармонларнинг ножўя таъсирини назарда тутиб, безарар усуллардан фойдаланган ҳолда комплекс даволашнинг янги технологиясини ишлаб чиқишга оид.

Ўзбекистон фтизиатрлар ва пульмонологлар илмий жамияти раиси (1986 й. дан), Европа респиратор жамияти ҳамда Халқаро сил ва ўпка касалликларига қарши кураш иттифоқи аъзоси (Париж). «Интерастма Россия — МДҲ жамияти» бошкарув аъзоси (Москва), Марказий Осиё пульмонологлар ассоциацияси вице-президенти. «Вестник» — Марказий Осиё пульмонологлар ассоциацияси журнали бош муҳаррири (1994).

Ас: Функциональные методы диагностики в пульмонологии (в соавторстве), Т., 1997; Ўпка саркоидози (ҳамкорликда), Т., 2000; Бронхиальная астма (в соавторстве), Т., 2001; Нафас органлари касалликлари, Т., 2004.

Loading...