ЁППАСИГА ТАНЛАШ — ўсимликларни нав стандартларига мувофиқ келадиган ташқи белгилари (фенотип)га қараб танлаш. Ўсимликлар селекцияси усулларидан бири. Танлаб олинган ўсимликлардан олинган уруғлик, лаб. таҳлили ўтказилиб, саралангач (яроқсизлари ажратилгач), бир пайкалга экилади. Шунга кўра, бўлажак нав сараланган энг яхши ўсимликлар авлоди бўлади. Ёппасига танлашни баъзан позитив усул деб аталади. Бу усул АҚШ ва б. мамлакатларда ғўза уруғчилигида кенг қўлланилади. Ёппасига танлашнинг бир кўриниши бўлган негатив танлаш (нотипик ва аралашма ўсимликларни яроқсизга чиқариш) асосан Ўзбекистон, Тожикистон, Туркманистонда қўлланилади. Ёппасига танлашни бир марта ва кўп марта ўтказиш мумкин. Бир мартали Ёппасига танлаш ўзидан чангланувчи экинларда, кўп марталиси четдан чангланувчи ўсимликларда яхшироқ самара беради. Четдан чангланувчи экинларда қимматли хўжалик белгиларини сақлаб қолиш учун нави. ч. дан олингунига қадар бўлган давр давомида Ёппасига танлаш ўтказилади. Бундай танлаш узлуксиз танлаш деб аталади. Популяциялар экиладиган шароитларга яхши мослашган ҳоллардагина Ёппасига танлаш яхши натижа беради. Ёппасига танлаш усули билан турли экинларнинг халқ селекциясида маҳаллий навлари ҳам яратилган. Ёппасига танлашнинг камчиликларидан бири танланаётган ўсимликларнинг келиб чиқишини текшириш имконияти йўклигидир. Бу камчилик селекцияда кенг тарқалган якка танлаш усули билан бартараф этилади (яна қ. Танлаш).