ЁРУҒСЕВАР ЎСИМЛИКЛАР

ЁРУҒСЕВАР ЎСИМЛИКЛАР, гелиофил ўсимликлар — қуёш нури тушадиган жойларда ўсадиган, сояга чидамсиз ўсимликлар. Ё. ў. нинг барглари нисбатан қалин, барг ҳужайралари майда, устунсимон ва ғовак тўқималарга яхши ажралган, оғизчалари кўп, барг тўрлари яхши ривожланган. Барг ҳужайраларида хлоропластлари сояда ўсадиган ўсимликларга нисбатан анча кўп, фотосинтез интенсивлиги жуда юқори бўлади. Ёруғсевар ўсимликларга зубтурум, акация, ғўза, эрта баҳорда кўкариб чиқадиган ва дашт ўсимликлари киради.