ЮМОРЕСКА (юмор сўзидан) — ҳазиломуз, кичик ҳажмли, одатда, чолғу пьеса; скерцота яқин. Мусиқада Юмореска номини Р. Шуман илк бор қўллаган (фортепиано учун Юмореска, 1839; фортепиано триоси учун Юмореска, 1842). Мазкур Юморескалар (немис ёзувчиси Жан Поль асарларида бўлгани каби) хаёлчан, лирик ва ҳазилчан лавҳалардан ташкил топган. Э. Григ, А. Дворжак, П. Чайковский, С. Прокофьев, Р. Шчедрин, Ўзбекистонда В. Сапаров (фагот ва фортепиано учун), Ҳаб. Раҳимов (пуфлама созлар оркестри учун) ва бошқалар Юмореска ёзишган.