ABDIROV Charjau Abdirovich (1933.20.12, Qoraqalpogʻiston Respublikasi Qoraoʻzak shaharchasi — 1997.3.7, Nukus) — mikrobiolog olim. Oʻzbekiston FA akad. (1989), Qoraqalpogʻistonda xizmat koʻrsatgan fan ar-bobi (1979). Tibbiyot fanlari d-ri (1973). Toshkent tibbiyot in-tini bitirgach (1955), shu in-t mikrobiologiya kafedrasining assistenti (1958 — 61), Oʻzbekiston Respublikasi FA Qoraqalpogʻiston filialida katta ilmiy xodim (1961—69), Oʻzbekiston Teri-tanosil kasalliklari i. t. instituti Qoraqalpogʻiston filiali direktori (1969), Qoraqalpogʻiston Sogʻliqni saqlash vaziri (1969—76), Nukus davlat un-ti rektori (1976—85), Oʻzbekiston FA klinik va eksperimental tibbiyot i. t. institutida boʻlim mudiri va direktor (1985-97). Asosiy ilmiy ishlari mikrobiologiya va immunologiya masalalariga bagʻishlangan. Oʻzbekiston Respublikasi Oliy Majlisining deputati va Oliy Majlisning Atrof muhit va tabiatni muhofaza qilish masalalari qoʻmitasi raisi (1994—97).