AMERIKA — ikki materik, yaʼni Shim. Amerika va Jan. Amerikadan iborat kitʼa; ular orasidagi chegara odatda Daryen boʻyni, baʼzan esa Panama boʻyni orqali oʻtkaziladi. Dunyodagi eng katta Grenlandiya o. va yon-atrofidagi bir qancha boshqa orollar ham Amerika tarkibiga kiradi. Gʻarbiy yarim sharda, Atlantika va Tinch okeanlari orasida. Shim. Amerikada koʻpincha Marka-ziy Amerika va Vest-Indiya o. lari alohida ajratiladi. Umumiy mayd. 42,5 mln. km2. Aholisi 724 mln. kishi (1990). Grenlandiya va Shim. Amerikaning shim.-sharqiy sohili 10 — 11-a. larda normannlar tomonidan kashf etilgan deb hisoblanadi. Antil orollari, Jan. Amerika sohilining shim. qismi xamda Shim. Amerikadagi Karib dengizi sohilining jan. qismini 1492—1503-y. larda X. Kolumb kashf etgan. Amerika rasmiy kashf etilishidan 5 asr ilgari Beruniy Gʻarbiy yarim sharda ham quruqlik boʻlishi mumkin degan fikrni aytgan. Amerika Amerigo Vespuchchi nomiga qoʻyilgan (q. Janubiy Amerika va Shimoliy Amerika).