BARRANKILYA — Kolumbiyaning shim. – gʻarbidagi shahar, Atlantiko departamentining maʼmuriy markazi. Aholisi 1,35 mln. kishi (1985, shahar atrofi b-n). Magdalena daryosi boʻyidagi port, okean kemalari ham kira oladi. Mamlakatning savdo-sanoat markazi. Neftni qayta ishlash, kimyo, sement, poyabzal, toʻqimachilik, metallsozlik va kemasozlik sanoati korxonalari mavjud. Barrankilya porti orqali chetga kofe, teri, neft mahsulotlari chiqariladi. Xalqaro aeroport, un-tlar bor. Shaharga 1629-y. da asos solingan.