GULDOʻZI

GULDOʻZI — zardoʻzlikdagi asosiy tikish usullaridan. Andaza asosida kesib olingan naqsh (gul) yuzasining oʻzi zar ip bilan qoplab tiqiladi, zamini ochiq qoldiriladi. Shuning uchun Guldoʻzi usulida bezatiladigan buyumning matosi, rangi, sifati hamda qoʻllaniladigan Guldoʻzi choklari muhim ahamiyatga ega. Charm, karton yoki qogʻozdan tayyorlangan naqsh-nusxa matoga tikib yoki yopishtirib biriktiriladi, ustidan zar ip bilan tikib boʻrtma naqshgul hosil qilinadi. 19-a. oʻrtalarida andaza charmdan, keyinchalik karton (Rossiyadan keltirilgan «latta qogʻoz»)dan tayyorlangan, 1870—75 y. larga oid buyumlar andazasi oq mesh (zamsha) charmdan tayyorlangan. Kichik gullar tagiga baʼzan paxta qoʻyib, bir necha qavat taxlangan mato ustiga tahrir choki tikilgan (yana q. Zamindoʻzi).