KOSBERGENOV Rzambet Kosbergenovich (1905—1979) — tarixchi olim. Qoraqalpogʻistonda xizmat koʻrsatgan fan arbobi (1973), tarix fanlari d-ri (1973). Qoraqalpogʻiston ped. in-tini tugatgan (1948). Oʻzbekiston FAning Qoraqalpogʻiston boʻlimi Iqtisod va madaniyat in-tida ilmiy xodim (1951 — 53), shu in-t direktori (1953—59); Oʻzbekiston FAning Qoraqalpogʻiston filiali N. Dovqorayev nomidagi Tarix, til va adabiyot in-tida tarix shoʻbasi mudiri (1959). S. P. Tolstoye va T. A. Jdanko boshchiligidagi Xorazm arxeologiya etnografiya ekspeditsiyasi qatnashchisi (1946—56). Kosbergenovning ilmiy faoliyati qoraqalpoq xalqining etnik tarixi va shakllanishiga bagʻishlangan.