ODILOV Hasan Pirmatovich (1960.24.7, Toshkent) — yogʻoch oʻymakori. Oʻzbekiston xalq ustasi (2002). 1982-y. dan «Usto» birlashmasida ishlab O. Fayzullayevdan yogoch oʻymakorligi sirlarini oʻrgangan. 1991-y. dan mustaqil usta. Respublika va xorijiy koʻrgazmalarda oʻzining «islimiy» va «girih» naqshli yogʻoch oʻymakorligi asarlari bilan qatnashib kelmoqda. Toshkentdagi «Toshkent kuranti» binosi zali, Temuriylar tarixi davlat muzeyi, Oliy Majlis binosi zali va b. maʼmuriy binolarning yogʻoch oʻymakorligi bezaklarini bajargan. Iqti-dorli ustaning Buxoriy yodgorlik majmui, Toshkentdagi xotira maydonidagi ayvonning ustun bezaklari diqqatga sazovor. Odilovning kursi va xontaxtalari koʻp qirrali, oʻziga xos ishlov berilganligi bilan ajralib turadi.